Aizawl, 24 Nov 2020: Mizoram leh Assam inrina bul, 509 square miles chhunga cheng Zohnahthlakte chuan Mizoram sawrkar hnuaia rilru nghet leh thlamuang taka awm an duh thu an sawi.
Thawhtanni khan Mizo Zirlai Pawl hruaitute leh Mizoram Journalists’ Association member-te inkawmnaah he thu hi MZP hruaitute hian an sawi a. Tunhnai khan Assam state chhunga awm nia inngai Zohnahthlak – Hrangkhawl, Chorei, Molsom, Ranglong leh Sakachep te inzawmkhawmna – Thangram Indigenous People’s Movement (TIPM) hruaitute nen an inkawmna chungchangte an sawi ho a ni.
Cachar district administration-in a enkawl, inner line reserved 509 square miles huamchhunga awm heng Zohnahthlakte hian Assam sawrkarin kawng hrang hranga a enhran dan leh, Assam state mi ni pawha ngaih an nih dante sawiin, electoral roll thlengin an tan luh a harsat thu leh, leileta lo neih bak sangha dil siam takngial pawh sawrkarin a remtih sak hleihtheih loh dan te MZP hruaitute nen an inkawmnaah hian an sawi.
Ziaka chhinchhiahna hrang hrangah Cachar hmun luah hmasa pawl an ni tih a lan laiin, tunah hian an vaiin 15000 vel nia an inhriat thu te, Bangladesh atanga dan loa rawn luta inbengbel zui ta te ai pawhin Assam sawrkarin an chunga rilru a put danah an dinhmun a hniam hial tak zawk thu te an sawi a ni.
Heng chhan hrang hrang avangte hian an unaute nen sawrkar khat enkawlna hnuaia awm a, Mizoram chhunga awm ve an thlakhlelh zia te, chumi atan chuan theihtawpa hma lak an tum ve dan te MZP hi an lo hrilh bawk a. Hemi ang hian a tul anga hma lakpui zui an tum tih MZP hruaitute hian an sawi a, anmahni ngei pawh hi Mizorama rawn kal a, mi pawimawh hrang hrangte la rawn hmuh an tum thu te an sawi bawk.
Heng Zohnahthlakte hian Mizoram leh Assam ramria buaina a awm a, chak lakna kawngpui dan a nih lai khan, lo neiha eizawng mi harsa te te mah nise, Mizorama an unaute tan an tih ve theih ang tih tumin buhfai, quintal 15 an lo khawnkhawm ve a, hei hi an khawn chhan ang ngeia tangkaia hman an duh angin an rawn hawnpui tih MZP hruaitute hian an sawi a. Hrileng avanga rei tak chhung tlawhpawh theih loha awm tawh, Aizawla Dinthar Veng khawtlang tan quintal 10 leh, Home harsa zual deuh tan quintal 5 dang hi hlan an tum tih an sawi a ni.
~ The Aizawl Post
Tags
News